పాత కాలపు ఇంటర్నెట్టు ...!

మొన్నోఆదివారం రోజు ,నేను తలనొప్పని ముసుగుపెట్టా .పాపాయి వాళ్ళ నాన్న ఏదో పుస్తకం అంతు చూస్తున్నాడు.అయితే పాపాయి ఏం చేస్తూ వున్నట్టూ? నాక్కూడా అచ్చు అట్లాగే డౌట్ వచ్చేసి లేచి చూద్దును కదా, నా బిడ్డ సీరియస్ గా కంప్యూటర్లో డాక్టర్ బార్బీగేమ్స్ఆడేస్తూ వుంది .అసలే ఆ పిల్లల పుస్తకాలూ యీ పిల్లల పుస్తకాలూ చదివేసి పాపాయిని పరిశోధనా శాలగా కదా చేసుకుని వున్నాను,ఆందుకని గొప్ప దిగులేసేసి ,లే పాపాయి లే అసలకి ఇప్పుడే పెద్ద బాలశిక్షలో అరుందతీనక్షత్రం గురించి,ధ్రువనక్షత్రం గురించీ చదివా వినవా అన్నాను .అంతే పాపాయి చిటికెల్లో సిస్టం ముందు నుండి లేచి ఏందమ్మా ...ధ్రువనక్షత్రమంటేనా ...?అనుకుంటా పిల్లి కూనలా వెనకాల వచ్చింది .ఇద్దరం ఆనక్షత్రం గురించీ ఇంకా పెద్దబాలశిక్షలో ఏమేం వున్నాయో ముచ్చటించుకుంటా వుండినాం .ముచ్చట్లలో పాపాయి 'పెద్దబాలశిక్ష అంటే పాతకాలపు ఇంటర్నెట్టు' కదమ్మాఅన్నది .ఆమాట విని నేను చాలా ఆశ్చర్యపడి భలే చెప్పావే ఆమ్మలూ అని మురిసా ..అప్పుడు పాపాయి,నేనుచెప్పలేదమ్మ్మానువ్వేచెప్పావు అని అన్నదీ .ఈ సారి నాభోధనకి నేనే ముచ్చటపడీ ,నాబిడ్డ జ్ఞాపకశక్తికి చాలా మురిసిపోయాను .

నిజం చెప్పమంటారా ...?

నిజంగానే ...పెద్దబాలశిక్ష,పాతకాలపు''వికీ''.

తన స్టూడెంట్స్ తో పాపాయి

గోసానిమారి .

మేముంటున్న కూచ్ బీహార్ కి దాదాపు నలభై నిమిషాల దూరంలో ఉంది ఈ గోసాని మారి .భూస్థాపితం ఐన ఒక రాజ కోట ఉంది ఇక్కడ .అది భూస్థాపితం ఎందుకయిందంటే ...అంటూ ఇక్కడి వాళ్ళు ఒక కథ చెప్పారు .

కామతేస్వర్ అనే రాజు ఈ రాజ్యాన్ని పాలించాట్ట . .రాజు గారు మొదట పశువుల కాపరి అట .ఊరందరి పశువుల్ని పచ్చిక బీళ్లలోకి తోలుకెళ్ళి, వాటి పలుపులన్ని ఊడ దీసి ,, పలుపులన్నిటినీ కలిపి తల కింద పెట్టుకుని నిద్ర పొయ్యే వాడట .ఆ పశువులు ఊరందరి పొలాలలో పడి మేసేవట.ప్రజలందరూ రాజు గారికి ఫిర్యాదు చేసారట .అప్పుడు రాజు గారికి కోపమొచ్చి స్వయంగా విచారించేందుకు వచ్చాట్ట ,రాజు గారు వచ్చేటప్పటికి నిద్ర పోతున్న ఈ కామతేస్వరునికి ఒక పాము పడగ విప్పి నీడ పట్టి ఉందట .అది చూసి రాజు వెనుదిరిగి వెళ్లి పోయాడట .

ఇలా జరుగుతూ ఉండగా ఈ కామతేస్వరునకి ఒక కల వచ్చిందట .కలలో దేవత చెప్పిందటా .......నేను నీ దగ్గరికి మూడు జంతువులను పంపుతాను వాటిలో నువ్వు దేనిని పట్టుకుంటావో దానిని బట్టి నీ అదృష్టం ఉంటుంది అని .మొదట పులి వచ్చిందట ,ఆ పై ఏనుగు వచ్చిందట ,రెంటినీ కామతేస్వరుడు పట్టుకోలేక పోయాడట చివరిలో పాము వచ్చిందట .పాముని కూడా వెళ్లి పోతూ ఉండగా తోక పట్టుకున్నాట్ట .అప్పుడు దేవత అన్నదట ,నువ్వు రాజువవుతావ్ ,కానీ నీ తర్వాత నీ రాజ్యం అంతరించి పోతుంది అని .

అట్లా కామతేస్వరుడు రాజయ్యాడు .చాలా యుద్దాలలో గెలిచాడు .అతనికి ఓ వరముండేదట ,ఏమనీ ....అతని ఎదుట నిలబడి ఎవరూ అతన్ని జయించలేరు .వెనక నుండి దాడి చేస్తేనే ఓడించ గలరు .అతనికి ఏడుగురు భార్యలు .ఏడో భార్యకి ఈ రహస్యాన్ని చెప్పాట్ట .ఆవిడ ఏం చేసిందీ ఒక యుద్ద సందర్భంలో ఈ రహస్యాన్ని శత్రువులకి చెప్పేసిందట .మరి చెప్పరేమిటి,,, అన్నేసి భార్యలుంటే .. ఎవరికేవరేంటి ...ఎవరికీ ఇతను నా సొంతం అనే ఫీలింగ్ ఉండదు కదా .

అట్లా శత్రువు వెనక మల్లుగా వచ్చి రాజా వార్ని పొడిసేసాడు.అప్పుదేమయ్యిండీ రాజా వారు శత్రువులతో అన్నారూ ,,నేను నా మందిరంలోని ఇష్ట దేవత కి నమస్కారం చేసుకుని వస్తాను అప్పుడు మీరు నన్నేమైనా చెయ్యొచ్చూ అని .శత్రువులు ఒప్పుకున్నారు .రాజా వారు వెళ్లి నమస్కరించారా ...ఇంకేముందీ రాజ మహల్ మొత్తం దానంతటదే తిరగబడి ఏడవ రాణితో సహా భూ స్థాపితం అయిపోయిందట .

అర్ఖియాలజీ వాళ్ళు తవ్వుతుంటేనట బోలెడు అపశకునాలు జరిగాయట అంచేత అసంపూర్ణంగా వదిలేశారట .ఇదీ కథ

ఇక్కడో మందిరం ఉండి .కామతేస్వరుడే నిర్మించాడనీ,ఒకటే రోజులో నిర్మాణం పూర్తయిందనీ వీళ్ళు చెప్పారు .

బయల్పడ్డ గోడ .
రాజుల్ పోయే... రాజ్యాల్ పోయే ...
తిరగబడ్డ కోట శిఖరం

మ్యూసియం
ఇది సగం తవ్వి అపశకునాలకి భయపడి వదిలేసిన ప్రాంతం
అచట పూసిన పూలు

మందిరం అరుగు మీద ఉన్న వృద్దుడు .దేవుడు ఈ రూపం లో కూడా చరించ వచ్చేమో కదా

విష్ణు మూర్తి ..ఎంత బాగుంది కదా ..అలంకరణ

కామినీ పూలు ...ఎటులైనా ఇచటనే ఆగిపోనా ....అనిపించేసింది ఆ పరిమళానికి

మందిర ముఖ ద్వారం



లోపలికి అడుగు వేయగానే కనిపించారు వీరు ...

నాలుగు మూలలా ఇలా నాలుగు మందిరాలుంటాయి

అర్థ మోహనరాగం

కవిత్వం అది పనిగా చదివిన అనుభవం ఎప్పుడూ లేదు నాకు ,ఆసక్తీ లేదు. అయినా సాహిత్య విద్యార్ధినిగా అనేకం చదవాల్సి వచ్చింది .చదివిన అంతలోనూ ఇస్మాయిల్ నాకెప్పుడూ తటస్థ పడలేదు .ఇస్మాయిల్ అద్భుత కవి . నేను కలవరించి chadivina కవిత్వం ఇస్మాయిల్ దే

ఈ 'అర్థ మోహనరాగం' అనే కవిత, ఇస్మాయిల్ ''కవిత '' అనే కవిత చదివిన తర్వాత రాసుకున్నది.

అనార్కిస్ట్ కవిలా

అతను

మహా దౌర్జన్యంగా

మానసోపరితలంపై

ఓ విత్తనాన్ని విసిరాడు

అనుమతి లేకనే

కాలాన్ని కత్తిరిస్తున్న

గడియారం ముళ్ళు

విత్తనాన్ని కాస్తా

గుచ్చి వెళ్ళింది

సందేహ స్వరాల మెట్లు

దాటుకుని

చిరు మొలక ముందు

మోకరిల్లి

గాఢ మోహన రాగాన్ని

మ్రోగించేలోగా,

అతను

కుదురు లేని

వలస పక్షిలా

వాలిన వయోలిన్ తీగలు

తెంచుకుని

యెగిరి పోయాడు

అఖండమై విస్తరించిన

ఆ విత్తనపు

వట వ్రుక్షంపై తిరుగుతూ

మెదడు నరాల నేతని

విప్పుకుంటూ ,నేను

అతని అడుగుజాడలకై

అన్వేషిస్తుంటాను .

నా చెట్టు

కొన్ని సార్లు

తేనె పూలు పూస్తుంది

అపుడపుడు

రాత్రి పక్షుల అరుపులకి

ఉలికి పడుతుంది

కురిసే మంచు

కాసే ఎండ

నా ముందు నుండే

నడిచి పొతాయ్.

చూసి చూసి

దారిన పోయే ఒకడు

ఇదంతా వ్యర్థమని

కలలనైనా అల్లాల్సిందేనని

మూర్తిమత్వం గురించి

వుపన్యసిస్తాడు

నేను ,ఇక ఇదే

చివరి కొమ్మనుకుంటూ

ఆ చెట్టులోని

మరో కొత్త కొమ్మ పైకి

నా అనవరత ప్రయాణాన్ని

ప్రారంభిస్తాను

నత్త ప్రణయయాత్ర

ఇస్మాయిల్ గారిది నత్త ప్రణయయాత్ర అనే పేరుతో హైకూలు పుస్తకమోటి ఉంది .ఇస్మాయిల్ కవిత్వమంటే ఎల్లపుడూ మురిసి పోతూ ఉంటాను గనక, ఇవాళ ప్రత్యేకంగా బలే ఉన్నాయని అనను .ఏమైందంటే ఇవాళ పెద్ద వర్షం మెరుములు, ఉరుముల్ని వెంటేసుకుని మా ఇంటికి వచ్చింది .నల్దిక్కులా పచ్చటి పచ్చదనం [అంటే మరీ పచ్చదనం అని అనమాట ]ఆహ్లాదాన్నవుతూ ,పరవశిస్తూ ...ఉండగా నా కుర్చీకి అటువైపున ఒక నత్త గారు ఎక్కడికో వెళ్తూ ఉన్నారు .మరేమీ ఆలోచించక మనసు ఇస్మాయిల్ గారి చివరి చిట్టి హైకూని గుర్తుకు తెచ్చేసుకుంది .బోల్డు నవ్వొచ్చింది .

సముద్ర ఘోషని

నిత్యం మోస్తుంది

నత్త

నత్త
నత్త గుల్లలో దూరి
ఏమి తల పోస్తుంది చెప్మా !

నత్త
ప్రియురాలి ఇంటికి
మెరిసే రోడ్డు వేసింది

నత్త

ప్రియురాలి ఇల్లు చేరేటప్పటికి

ఆమె ముసలిదైపోతుంది