అప్పుడు కూడా నువ్వు ...!

 పాపాయి ఫోన్ చేసింది,లైబ్రరీ కి వెళుతున్నానని చెప్పింది."లైబ్రరీ కి వెళ్ళడానికి కూడా makeup వేసుకుంటున్నా అమ్మా! ఎందుకు చెప్పూ,మొన్న హాస్పిటల్ లో అడ్మిట్ అవటానికి వెళుతున్నప్పుడు కూడా రెడీ అయ్యి వెళ్ళా అమ్మా, నేను చచిపోయాక నా బిడ్డలకు చెబుతాను నాకు క్లాసిక్ మార్లిన్ మన్రో మేకప్ వేసి బరీ చేయమని "అన్నది."తల్లి సాలు బొల్లి పిల్ల కదా "తల్లి చేలో మేస్తుంటే దూడ మాత్రం గట్టున మేస్తుందా అని నిట్టూర్చి ,పనిలో పనిగా" ఒరేయ్ నేను చచిపోయాక నాకు క్లాసిక్ మేకప్ వేసి, ముత్యాలు,పచ్చలు ,కెంపులు వుండే నగలు పెట్టి నన్ను వారణాశిలో గంగ ఒడ్డున దహనం చెయ్యాలి"అని నా కోరిక కూడా చెప్పేశా .వెంటనే పాపాయి " అమ్మ ,అమ్మ వద్దమ్మ,నిన్ను పూడ్చి పెడితే అప్పుడప్పుడూ నీ దగ్గరికి వచ్చి ఇట్లాగే నీ తల తినొచ్చు కదమ్మా,కాల్చడం వద్దమ్మా " అన్నది.నేను తల్లి ప్రేమతో వెంటనే నా కాశీ కోరికను గంగలో కలిపేసి "సరేలేవే! కానీ నన్ను పూడ్చిన చోట నా పైన ధాన్యం పండించి ఆ ధాన్యాన్ని దానం ఇవ్వు "అన్నాను. దానికి కూడా"అమ్మ అట్లాగ కూడా వద్దమ్మ "అన్నది.అంటే నన్ను ఏం చేయాలో ఇదమిద్దంగా ఆలోచించలేదనమాట, మొత్తానికైతే,తను ఎక్కడుంటే అక్కడ దగ్గరగా పెట్టేసుకోవాలని ఆలోచన ఒకటి మనసులో ఉన్నట్టుంది.మళ్లీ ఒక నిమిషానికి కాస్త ఆలోచించి ,"ఏమో అమ్మా,ఏదయినా నచ్చకపోతే అప్పుడు కూడా వచ్చి బెదిరించేస్తావ్ నన్ను" అన్నది.నాకు నవ్వొచ్చింది"ఫరవాలేదు లేవే పాపాయి! ఆ మాత్రం అమ్మంటే భయం వుంది,ఇంక నిశ్చింతగా చచిపోవచ్చు "అని చెప్పాను.

నిజాలిన్ గప్పా!

పాపాయి ఇప్పుడు ప్లస్2 చదువుతోంది. మానవీయ శాస్త్రాలు తన గ్రూప్.ఈ రోజు  నా తల దగ్గర కూర్చొని రేపటి పరీక్ష   కోసం పడీ పడీ చదువుతోంది. వద్దన్నా నా మనోప్రాణాలన్నీ దాని చుట్టే తిరుగుతూ వుంటాయి కదా  ,దాన్లో భాగంగా "నిజాలిన్ గప్పా" పేరు నా చెవిలో పడింది.ఇదేం పేరు అనుకుని సరేలే అని ఊరుకున్నాను. మళ్ళీ కాసేపటికి వల్లె వేయడం లో భాగంగా "నిజాలిన్ గప్పా"వచ్చాడు.ఈ సారి "నిజాలిన్ గప్పా ఫ్రమ్ మైసూర్" అని నా చెవిలో పడింది.ఈ సారి ఎవరబ్బా నాకు తెలీని ఈ మైసూర్ గప్పా అనుకుని పక్కనే పేపర్ చదువుకుంటున్న  పాపాయి వాళ్ళ నాన్నని కేకేశాను.నాన నేను "నిజాలిన్ గప్పా" ఎవరు అని అడగగానే పేపర్లో నుండి తలెత్తకుండా ,"నిజాలిన్ గప్పా"ని సింపుల్ గా నిజలింగప్ప ఎవరో చెప్ప సాగాడు.నాన్న ఎప్పుడయితే నిజలింగప్ప అన్నాడో మిగిలినది వినకుండా నాకు "నిజాలిన్ ...గప్పా"ఎవరో అర్తమయిపోయింది .నేను పాపాయి వైపు చూస్తూ వుంటే పాపాయి ,నేనేం చేసేది అమ్మా,  ఇంగ్లీష్ లో  అలా వుంది అని ఆంగ్ల భాష పైకి నేరం తోసేసి , అప్పటికీ  నీకు తెలియకుండా , వినిపించకుండా చదవాలనుకుని మరిచి పోయా అన్నది.

పగలు కురిసిన మేఘం

నా బుజ్జి బంగారు తల్లి , పొద్దున్నే ఫోన్ చేసింది " అమ్మ ..అమ్మా ! రాత్రంతా వానొచ్చిందమ్మా , మెరుపులొచ్చాయమ్మా  కానీ , పొద్దునయ్యేసరికి తగ్గిపోయిందమ్మా " అంది ఏడుపు గొంతు పెట్టేసుకుని ,బడికి పోవాలి కదా అనిచెప్పి . నేనన్నాను "అయ్యో .. ప్చ్ ! ఏం చేద్దాంరా , నేను గనుక మేఘాన్నయ్యుంటే పొద్దున్న నువ్ బడికెళ్లే సమయానికి కురిసేదాన్ని " అన్నాను . పాపాయి " అవునమ్మా ! ఈ మేఘం నీలాంటిది కాదమ్మా , బుద్ధిలేని మేఘం , చెత్త మేఘం " అని నిర్ధారించింది . 

'' చూసావామ్మా ! మమ్మీ ఎంత ముదురో '' !

పాపాయి తొమ్మిదో క్లాస్ చదువుతుంది కదా .. కానీనేమో దానిదింకా ముద్దుగారే అమాయకపు బుర్రే . ఏమైందీ ,ఆ మధ్యన ఫిబ్రవరి 14 వచ్చింది కదా ఆరోజుకి ముందురోజు మధ్యాన్నం నేను దానికి ఫోన్ చేసాను . మమ్మీ దానికి పక్కనే కూర్చుని బువ్వ తినిపిస్తూ వుంది . పాపాయి ఫోను అందుకోగానే ''అమ్మా ఈ రోజు మా స్కూల్ లో అన్ని క్లాసులకి కిటికీలు మూసేస్తున్నారమ్మా '' అన్నది . నేను ఆశ్చర్యపడి ''ఎందుకమ్మా ?''అని ప్రశ్న వేసాను . అది '' నీకు తెలీదా..  వాలంటైన్స్ డే రోజు అబ్బాయిలందరూ అమ్మాయిలకి ఏమయినా లెటర్లు ,గిఫ్టులు ఇస్తారని అట్లా చేస్తారు '' అన్నది . నేను '' మరీ చోద్యంరా ఇది కిటికీలు మూసెయ్యడం ఏంటీ చిత్రంగా '' అని దీర్ఘం తీసాను . పాపాయి ''నీకు తెలీదులేమ్మా ! మా స్కూల్ వాళ్ళు ఏది చేసినా అది మంచిదే '' అన్నది . నేనేమో తారీఖులు గుర్తులేని గృహ జీవితంలో వున్నా కదా అందుకని , ''యెప్పుడురా ఇంతకీ ప్రేమికుల రోజు ?'' అన్నాను . పాపాయి ఏమనుకుందీ  చాలా చాలా కాలం నుండి ఫిబ్రవరి పద్నాలుగో తేదీన ప్రపంచం ప్రేమికుల రోజు అని ఒకటి జరుపుకుంటుందనీ ,అది తనలాటి చిన్నపిల్లలకి కూడా తెలుసుననీ , అమ్మకి తెలియకపోవడమేమిటనీ చాలా ఆశ్చర్యపడి ''నీకసలు వాలంటైన్స్ డే ఎప్పుడో నిజంగా తెలీదామ్మా '' అన్నది బిగ్గరగా . నేను దాని ఆశ్చర్యానికి ముచ్చటపడి ,దాన్నలాగే కొనసాగిద్దామనుకుని ''తెలీదురా '' అన్నాను . పాపాయి ఆశ్చర్యంతోనే అన్నం తినిపిస్తున్న అమ్మమ్మ ని '' నువ్వు చెప్పుమా వాలంటైన్స్ డే ఎప్పుడో '' అన్నది . మా అమ్మ చాలా గర్వంగా ,తనకున్న అపారమైన పత్రికా జ్ఞానాన్ని ప్రదర్శిస్తూ '' ఫిబ్రవరి 14 రా  ''అన్నది . మా అమ్మాయి వెంటనే '' చూసావామ్మా ! మమ్మీ ఎంత ముదురో '' అన్నది

.హమ్మయ్య ! ఎలాగయితేనేం ,ఇవాళ నేను ముదురు కాకుండా తప్పించేసుకున్నాను ! 

ఒక్క నిముషం కళ్ళు మూసుకుంటే పోలా !

ఈ మధ్య కొత్తగా పాపాయి వాళ్ల  తాత ,మమ్మీ అందరూ కలిసి నెట్ ఫ్లిక్స్ లో అవీ ఇవీ చూట్టం మొదలు పెట్టారు . పాపాయి కి అత్యంత ఫేవరేట్ ''వాంపైర్ డయరీస్ '' దుర్గాపూర్ లో మా ఇంటి ఎదురుగా కాపురముండే  వీధి కుక్కకి కూడా ''ఎలెనా గిల్బర్ట్ '' అని అందులోని హీరోయిన్ పేరు పెట్టింది . సరే అట్లా తాత ,మనవరాలు ,మమ్మీ అని పిలువబడే అమ్మమ్మ అందరూ ఇవి చూస్తూండగా ,ముద్దులు గట్రా వస్తే తాత '' చిట్టీ ! తీసేయ్ తీసేయ్ '' అంటాట్ట . ఆ విషయాన్ని నాకు కంప్లైంట్ చేస్తూ పాపాయి ''ఒక్క నిముషం వాళ్లిద్దరూ కళ్ళు మూసుకుంటే  పోలా అమ్మా  ! దానికి మార్చడం ఎందుకు చెప్పూ !'' అన్నది . నేను చాలా ముచ్చట పడి  , '' కళ్ళు మూసుకోవాల్సింది నువ్వు కదరా పాపాయీ  ''! అన్నాను . 

తాతకి నా పోలిక !

పాపాయి వాళ్ళ చిన్న మామ కి పాపాయి పుట్టింది , అక్టోబర్ లో ! పాపాయి వాళ్ళ తాత కూడా అక్టోబరే . బుజ్జి దాని పేరు మెలొడి . అది కూడా అచ్చం తాత లాగే సగం కళ్ళు తెరుచుకుని నిద్రపోతుంది . అందుకని నేను పాపాయితో ''మెలొడీకి అచ్చం తాత పోలిక రా '' ! అన్నాను ,పాపాయి క్షణం కూడా ఆలోచించకుండా '' ఆఁ ! తాతకన్నీ నా పోలికలమ్మా , తాత కూడా నా లాగే తలకింద చెయ్యి పెట్టుకుని నిద్ర పోతాడు '' అన్నది . అది విని తాత కూడా మనవరాలికి సపోర్ట్ వచ్చి '' అవునురా ! మెలొడీకి వాళ్ళ తాత పోలికలు , నాకంతా నీ పోలికలు '' అని వాక్రుచ్చాడు . 

అయ్యప్ప

పాపాయి అన్నదీ , తాత అయ్యప్పా అయ్యప్పా అని పూజ చేస్తాడు కానీ , అయ్యప్ప ఎలా పుట్టాడో మాత్రం తాత తెలుసుకోలేదు .

'రాముడు !

పాపాయి చెప్పింది .. '' ఎవరో ఏదో అన్నారని సీతని వదిలేసిన రాముడి ని పూజించడం చట్టరీత్యా  నేరం ''. చిన్న స్థాయినుండి వచ్చి ఎదిగిన ,ధర్మం కోసం నిలబడతానని చెప్పిన కృష్ణుడు పూజనీయుడు . 
 

పొగిడే మిషన్

 మొన్నో రోజు పాపాయి ఫోన్ చేసింది . వీడియో కాల్ . ఇల్లంతా సందడి సందడి గా వుంది . ''నీకేం  లేవే , అదృష్టవంతురాలివి , అవ్వ ,తాత , అత్తలు మావలు , తమ్ముడు .... నాకు చూడు  ఇల్లంతా ఖాళీ ''అంటే పాపాయి వెంటనే ''నీకేమమ్మా , ఆల్ ఇన్ వన్ నాన్న వున్నాడు కదా , అమ్మ నాన్న తమ్ముడు ఇంకా నిన్ను పొగిడే  మిషన్ కూడా కదమ్మా నాన్న'' అంది

మోడీ గారు

నెల్లూరులోవిద్యావంతుల వేదిక నుండి  డీమోనిటైజేషన్ పై రౌండ్ టేబుల్ కాన్ఫరెన్స్ పెట్టాం . పాపాయి వంతు వచ్చినప్పుడు , ''నోట్ల రద్దు వలన నాకయితే ఏం ఇబ్బంది రాలేదు కానీ మా తాత చాలా ఇబ్బంది పడ్డాడు. పెన్షన్ తెచ్చుకోలేకపోయాడు . ఎంతసేపు లైన్లో నిలబడినా వీలుకాలేదు . మోడీ గారు కెన్యా లాగ భారత్  ను కూడా డిజిటలైజ్ చేస్తే బాగుంటుంది '' అని చెప్పింది . మేమందరం మోడీ గారిపై మీ అభిమానం బాగుంది అని వెక్కిరించడం మొదలు పెట్టాం . అప్పుడు అది '' కాదమ్మా , ఆయనెంత గొప్పవాడు చెప్పూ ... అంత పేదరికం నుండీ, కింది కులం నుండీ ప్రధానమంత్రి అయ్యాడు . గొప్ప కాదా ... గౌరవించవద్దా ?'' అని ప్రశ్నించింది . నిజమే కదా , ప్రధానమంత్రులు అందరు ఆ తానులో ముక్కలే అయినప్పుడు , పేదరికం నుండి వచ్చినందుకు ఆయనకివ్వాల్సిన గౌరవాన్ని ఆయానికిచ్చే తీరాలిగా . యు ఆర్ రైట్ పాపాయి గారు ,మోడీ గారు గొప్పవారు .

కవిత్వం

రోడ్లో నిలబడి పాపాయి ఫ్రెండ్స్ తీర్పుల కోసం పాపాయి ని కేకలేస్తున్నారు . పాపాయి మమ్మీ ని పిలిచి ''మమ్మీ ... వాళ్ల గోల ఏమిటో చూడు కొంచెం ,నేను కవిత్వం రాస్తున్నా '' అంది .

అమ్మా... అమెజాన్ లో బిడ్డలు దొరకరా ?

ఈ పోస్ట్ సిలిగురిలో రాయాల్సిన పని .  రాయాలనుకుంటూనే ఇప్పటి వరకూ చేసేసాను .చాలా మరిచి పొయాను. అట్లాగే మనం పిల్లల అల్లరులన్నీ మరిచి పోతామనుకుంటా . 

పాపాయికి సిలిగురికోచ్చాక హటాత్ గా తమ్ముడో, చెల్లో   కావాలని కోరిక మొదలయింది . అదీ అప్పటికప్పుడు కావాలని . అప్పుడిక షీలాని ,అనితాని ఇన్వాల్వ్ చేసి ఆ విషయం మీద రీసెర్చ్ మొదలెట్టింది . మా అమ్మాయికి విపరీతమైన   మేనేజ్మెంట్ స్కిల్స్ వున్నాయి ,ఎటువంటి  మనుషుల్నైనా తనని ప్రేమించేట్టు చేసుకోగలదు . అలా తనేం చెప్తే అలా వినేట్టు షీలా ని మేనేజ్ చేసింది . షీలా ఏం చెప్పిందంటే బెంగాల్లో యాభై రూపాయలకి కూడా బిడ్డ దొరుకుతుందని . పాపాయి సేవింగ్స్ అప్పటికి ఎయిట్ తౌసండ్ . ఎయిట్ తౌసండ్ డివైడేడ్ బై  ఫిఫ్టీ అనుకోండి ... అదన మాట సంగతి .పాయికి చాలా ధైర్యమొచ్చి అమ్మని బైపాస్ చేసి బిడ్డని వెతక బట్టింది . పొద్దున్న లేసినదగ్గర నుండి వాళ్ళతో ఒకటే మంతనాలు . మధ్యలో షీలా ,''మేడం వాళ్ళింటికి రాబోయే బిడ్డ ఎవరో ... అదృష్టం''అని చేతులెత్తి టాకూర్ కి ప్రణామ్  చేసుకునేది .మా అమ్మాయి మాటల్ని ఖండించడమో ,సలహాలివ్వడ మో ,చదువుకో అని పదే పదే  వుపన్యసించడమో  వంటివి నాకు ఇష్టం లేని పనులు ,అందుకని నేను ఈ చోద్యమంతా కేవలం చూస్తూ వుండేదాన్ని .

కానీ పాపం, పాపాయి ఈ ప్రయత్నాలన్నీ విఫలం చెందాయి . అప్పుడిక హటాత్ గా ఓ రోజు దాని దగ్గర ట్యూషన్ చెప్పించుకోవడానికి వచ్చే అబ్బాయికి దాని తమ్ముడి పదవిని ఇచ్చేసింది . ఒక రోజు అమాయకంగా చదువుకని వచ్చిన వాడిని పటుకుని మొదట శుభ్రంగా తల స్నానం చేయించింది . భోగీందర్ ని బజార్ కి పంపి కొత్త బట్టలు తెప్పించింది . ఆ తర్వాత చదువు చెప్పడం మొదలు పెట్టింది . పాపాయి తమ్ముడు చాలా తెలివయిన వాడు . టీచర్ ''దీదీ '' కాగానే చదువు అటకెక్కించాడు . పాపాయి ఏమిటేమిటో తినబెడుతుంది కదా వాడికి ,అవంతా ఎక్కువై తింటే తినడం , లేదంటే పారేయడం మొదలు పెట్టాడు . అది చూసి అప్పుడు అక్కడే వున్న నా తమ్ముడు ''అట్లా వేస్ట్  చెయ్యడం ఎందుకురా పాపాయి'' అని ఖండించబోతే '' పేద వాళ్ళంటే నీకెందుకంత చులకన రా శ్రీకాంత్ '' అని కయ్యానికి కాలు దువ్వింది కమ్యునిస్ట్ సిద్దాంతంతో . అంత చేసినా పాపం ఆ తమ్ముడు రాత్రయ్యేసరికి ''అమ్మ కావాలో మొర్రో మొర్రో ''మని ఏడ్చాడు . ఆ రోదనకి దడుచుకుని పాపాయి ముఖం చిట్లించేసి తాత్కాలికంగా తమ్ముడు ప్రయత్నాన్ని విరమించేసింది .

ఇది జరిగిన మూడేళ్లకి ఇప్పుడు పాపాయి వాళ్ళ మామకి కొడుకు పుట్టాడు . ''బిడ్డ పుడితే నాకిచ్చేయ్యాలి ''  అని ముందే చెప్పి ఉంచింది కదా పాపాయి . అయినా ఇస్తారో ఇవ్వరోనని దానికి సందేహం . ఎందుకంటె అప్పుడు షీలాతో కలిసి చేసిన వేటలో అయిదుగురు బిడ్డల తల్లి , కడుపులో వున్న ఆరో...  బిడ్డని ఇమ్మని అడిగితే, చిరాకు పడటమే కాక ''కంటే తెలుస్తుంది నెప్పి ''అని షీలా మీద విరుచుక పడ్డదట . పాపాయికి ఆ మాట అలానే మనసులో వుంది . ఆ సందేహాన్ని నాతో చెప్తూ వచ్చింది ఇన్ని రోజులూ . ఇప్పుడిక ఇవాళ మామ కొడుకుని  పుట్టిన మూడో రోజునే  ''తమ్ముడ్ని ఇంక  మాకిచ్చేయమని చెప్పు మమ్మీ'' అని మా అమ్మకి రాయబారం బాధ్యతలు చెప్పింది . అది విని మా అమ్మ, తెలివి తక్కువ , నిజాయితీ ఎక్కువా అయ్యి ''వాళ్ళెందుకు ఇస్తార్రా మీనాలు ''అనేసింది  . అంతే పాపాయి బోర్ల పడుకుని రెండు  గంటలు ఆరున్నొక్క రాగం తీసి ,ఆ రాగం లోనే పక్కనే వున్న నారాయణమ్మని ఇప్పటికిప్పుడు బిడ్డలెక్కడ దొరుకుతారో  విచారించింది . విచారిస్తూ హటాత్ గా నా వైపు తిరిగీ.. ..
''అమ్మా... అమెజాన్ లో బిడ్డలు దొరకరా ? '' అని ప్రశ్నించింది.

సావిత్రి

పాపాయి  మంచి లీడరు !
మహానటి సావిత్రి గారి అభిమాని .

ఈరోజు మిద్దెపైన ఆడుకుంటూ వున్నారు పిల్లలందరూ.
నేనూ అక్కడే వున్నాను .

నా మొబైల్ లో ఏదో చూస్తూ పాపాయి  పక్కనున్న అంజూ ని అడిగింది

అంజూ నేనెలా వుంటాను ?
అంజు: సావిత్రి లాగా అక్క....

రేయ్  హనుమోష్ నువ్వు చెప్పురా నేనెలా వుంటాను ?
హనుమోష్ ముద్దుగా ,మందంగా మాట్లాడుతాడు .
వాడు కూడా సావిత్రి లాగా ... అన్నాడు

పాపాయి :ఊ ...

ఇదంతా విని నేను బహు ఆశ్చర్య పడి అసలు వాళ్ళు సావిత్రిని చూసారా పాపాయి అన్నాను .
పాపాయి :ఆ ... చూపించా

అదన మాట విషయం .

ఇప్పుడు చెప్పండి పాపాయి లీడరేనా ?

పాపాయి రాసిన తొలి గేయం !

పాపాయి తెలుగు నేర్చుకోవడం మొదలు పెట్టి దాదాపు ఆరు నెలలు అయింది . ఈ వారం రోజులుగా రోజుకు మూడు ఆటలు చొప్పున పాత సినిమాలు చూస్తూ వుంది . గోదారీ గట్టుందీ ,ఔనంటే కాదనిలే ,బొమ్మను చేసి ప్రాణము పోసి ,నీవు లేక వీణా ... వంటి పాటలు వింటూ వస్తూ వుంది . అందుకనేమో ఈ రోజు పాట  రాస్తానమ్మా అని చెప్పి ఈ పాట రాసింది .

ప్రకృతి 

 చల్ల చల్లని గాలి వీస్తుంటే 

నేను చెట్లు క్రిందట బానిసలా వుంటే 

భలే ఉందిలే 

ఆడవారు ముగ్గులేస్తూ వుంటే 

సంతోషంగా ఉందిలే 

బంతి పూలు 

అలా మెదలుతూ వుంటే 

భలే ఉందిలే 

ఆకాశంలో పక్షులు 

ఎగురుతూ వుంటే 

సంతోషంగా ఉందిలే 

నీటిలో చేపలు 

ఎగురుతూ వుంటే 

భలే ఉందిలే 

నేను ఇలా ఈ జగమును 

సృష్టించినది ఎవరు అని 

తెలుసుకోలేక బాధపడుతూ వుంటే 

నవ్వొస్తుందిలే 

పాపాయి రాలేదు

 ఈ సారి ప్రాతినిధ్యకు పాపాయి రాలేదు . అడుగుతే నేను రాలేను నాలుగు రోజులు స్కూల్ కి వెళ్లకుంటే ఇన్కంప్లీట్ పడతాయి అన్నది . నేను దాని శ్రద్దకి  చాలా ముచ్చట పడి సరే అన్నాను . కానీ చాలా మిస్సయ్యాను . లోలోపల చాలా గర్వంగా వుంటుంది దాని స్వంత నిర్ణయ శక్తికి .ఆవిష్కరణ ఫోటోలు ఇక్కడ చూడొచ్చు  prathinidhya.blogspot.in

............!!!!!

ఆశ్చర్యం !

అమ్మ ఈ మధ్య చాలా పనులు పెటుకుంది . ముసలి వాళ్ళమై పోతే ఎనర్జీ వుండదు కదా ,నలభై  లోపలే చేయదలచుకున్న విషయాలని ఒక దారిలో పెటుకోవాలి అని అమ్మ కోరిక . అందుకని అమ్మ పాపాయిని,నానని వదిలేసి ,పాపాయి వాళ్ళ నానమ్మ వూరిలో క్యాంపు  పెట్టేసింది . మొన్న ఇంటికొచ్చింది . అప్పుడిక పాపాయి వాళ్ళ నాన అన్నాడు ... ''ఇలా కాదు కానీ, నువ్వు ప్రతి శుక్రవారం బయల్దేరి రా !మళ్ళీ సోమ వారం వెల్దువు కానీ'' అని  . అప్పుడిక అది విని నిండా జలుబు చేసి వున్నపాపాయి అన్నదీ ''అవునమ్మా మేము జలుబు ,నువ్వు అమృతాంజన్ రిలీఫూ ''అని . 

డాగ్ షో

నిన్న మా మాల్దా లో డాగ్ షో జరిగింది . పాపాయి ఇక పొద్దుటి నుండీ ఉత్సాహ పడటం మొదలెట్టింది . పాపాయి వాళ్ళ నాన ''కాదురా మీనాక్షూ మన వాటికసలు డిసిప్లెన్ లేదు కదా అక్కడేమో అన్నీ ట్రైన్డ్ డాగ్స్ వస్తాయి కదా .వద్దులె రా...'' అని అన్నాడు . అయినా పాపాయి ఆహా తీసుకేల్లాల్సిందే అన్నది .

వాటి కోసమని ఏదో బట్ట ముక్క తీసుకుని బటన్ పెట్టి వాటికి బౌ కుట్టింది .స్నానమ్ చేయించింది . మాకేమో  చాలా రోజుల నుండీ సినిమా టికెట్స్ బుక్కవుతూ కేన్సిల్ అవుతూ నిన్నటికి కుదిరింది .తప్పకుండా చూడాల్సిన అపర్ణా సేన్ ''గోయినార్ బాక్షో '' సినిమా . దేయ్యముంది  ఆ సినిమా లోరారా [పాపాఇకి దెయ్యాల సినిమాలంటే ఇష్టం]  అన్నా పాపాయి నేను రాలేను అనేసింది . సుక దేవ్ ని ,రాజీవ్ ని తీసుకుని డాగ్ షో కి వెల్లి పోయింది  .

నాన డాగ్ షో ని లాంచనం గా ప్రారంభించి ఇంటికొచ్చాక మేమిద్దరం ''గోయినార్ బాక్షో '' సినిమాకి వెళ్లి పోయాం . మధ్యలో పాపాయి ఫోన్ చేసింది కాంచనా కి ప్రైస్ వచ్చిందని . ఆ తరువాత మేం వచ్చాం . అప్పటికి రాజమ్మ కి కూడా ప్రైస్ వచ్చిన్ది. ఎట్లాగబ్బా అంటే కాంచన గోల్డెన్ రిట్రీవర్  కదా ... దాని జాతిలోని ఒక పదమూడేళ్ళ ముసలి కుక్కని ఓడ కొట్టేసి రన్నింగ్ లో ఫస్ట్ ప్రైజ్ తెచ్చుకున్నది . రాజ మల్లిక కూడా రన్నింగ్ లో ఫస్ట్ వచ్చింది అదేట్లాగరా అంటే పాపాయి చెప్పిందీ . దాని జాతిలో అదొక్కటే ఫిమేల్ అట అందుకని .ప్రైజ్ ఇచ్చారట .ఇంకా ఏందంటే రాజమ్మ రన్నింగ్ రేస్ మధ్యలో చటుక్కుని పడుకుని నేను లేవనంటే లేవనన్నదట . [దానికిష్టం లేని పనులు చెప్తే అడద ట్లాగే పడుకుని ఇక ఎందరు లేపినా లేవదు] పాపాయి ఏం చేసినా లేవ లేదట . అయితేనేం బహుమతి తెచ్చుకున్నది .

అక్కడికి వచ్చిన వాళ్ళలో పాపాయి యంగేస్ట్ పార్తిసిపెంట్ అట .వేరే కుక్కలికి పెద్ద  పెద్ద కప్పులు స్వయానా వాళ్ళ నాన ఇస్తుంటే పాపాయి ,స్పోర్టివ్ నెస్ వున్న  బ్రాడ్ మైండెడ్డ్ బిడ్డ  కనుక కొంచెమన్నా ఫీలవకుండా  ,ఈ సారి వీటికి పుట్టే బిడ్డల్ని బాగా ట్రైన్ చెయ్యాలి అనుకుంది .ఆ బహుమతులకే ఉబ్బి తబ్బిబ్బయింది .

పీ.యెస్ :ఆ రోజు సాయంత్రం పాపాయి వాళ్ళ నాన దగ్గరికి బోలెడు సర్టిఫికెట్స్ వచ్చాయి సంతకాల కోసం డాగ్ షో వి .నాకు చిరాకొచ్చింది .పొద్దుటి  నుండి అవసరమైన ఫైల్లే  బోలెడన్ని వుంటాయి . తలెత్తకుండా చదివి సంతకాలు చేసినా ఆదివారానికి మూడు మూటలు సిద్దంగా వుంటాయి. అవి  చాలక ఈ డాగ్ షో ల సంతకాలు కూడానా అని నేను విసుక్కున్నాను. పొడుగు సంతకం ఎందుకులే ఏదో ఒకటి పెడుదూ అని పొట్టి సంతకం పెట్టించాను పాపాయి వాళ్ళ నాన చేత . రాత్రి సినిమా నుండి తిరిగొచ్చి ప్రైజ్ డిస్ట్రిబ్యుషన్ కి కలుసుకున్నామా అప్పుడు అక్కడి వాళ్ళ ఆనందం చూస్తే అవును కదా ఇలాటి వుద్యోగం ఒప్పుకున్నాక ఇక పొట్టి సంతకం అంటే కుదురుతుందా అనిపించింది. డిగ్రీ సెకండ్ యియర్లో నాకో స్టేట్ లెవల్ ఎస్సే రైటింగ్ బహుమతి లభించింది . మెడల్,సర్టిఫికేట్ ,హైదరాబాద్ l b స్టేడియం లో బహుమతి ప్రధానం . చంద్రబాబు నాయుడు చేతుల మీదుగా ,ఆయన సంతకం తో బహుమతి పొందటం గొప్ప కదా . ఇది కూడా అంతే కదా అని సన్నివేశాన్ని అన్వయించుకున్నాను. అన్నట్టు నేను హైదరాబాద్ కి మొదట రావటం అదే .

పాపాయి స్పీచ్...

ప్రాతినిధ్య ఆవిష్కరణలో సామాన్యకిరణ్ ఫౌండేషన్ గురించీ ,సావిత్రీ బాయి ఫూలే వర్ధంతి నాడు రిలీస్ చేయాలనుకోవడం వెనుక కారణం గురించీ పాపాయి ఇలా స్పీచ్ ఇచ్చింది . ఇందులో భావాలు పాపాయివే . సరళీకరించిన భాష మాత్రం వాళ్ళ నానది

good evening to all.

it is a pleasure and a privilege to speak here.

i have listened ramayana many times .at times my grand father narrated and some times my mother.every time i used to feel that seeta has not studied and could not work hence she cried a lot.

never in india ,wives lit the pyre of husband as far as i know.but once i heard in a discussion in my family that savitri bhai phule had lit the pyre of her husband.i was surprised ..then i started learning about savitri bhai phule gradually...she desired women's freedom,worked for widow remarriages......more surprising was to learn that she was the first lady teacher in first girl's school.....i pondered ...whether there was no education for mothers and girls before that....how miserable was the world then?these thoughts terrified me..a strong feeling over whelmed me that no girl child should ever remain uneducated...there should be equal opportuities for all human beings.this motive has driven us towards samanyakiran foundation.savitri bhai phule is our inspiration.we draw courage from her life and hope she is the one who can give strength to other women also.

hence we proudly and affectionately remember her today and would like to call this stage as mahatma savitri bhai phule pavillion.

i thank you all for listening my words.

పాపాయి చెప్పిన పాటాలు !

1]అప్పుడో రోజు పాపాయి వాళ్ళ నాన ఆఫీస్ కి ఇద్దరు కోయ దొరలు  వచ్చారు.వాల్లట్లా దేశమంతా తిరుగుతూ వుంటారట .సమ్మక్క సారక్క మతం వాళ్ళది .వరంగల్  నుండి అనగానే నాన ఇహ ఉప్పొంగి పోయి భోజనం చేసి వెళ్ళమని  ఇంటికి అంపించాడు .వాళ్ళు పనిలో పనిగా అమ్మ కి జోస్యం చెప్పడమే కాక పాపాయికి  కూడా  చెప్పటం మొదలెట్టారు .వాళ్ళు మాట్లాడుతుంటే పాపాయి మొహాన మౌనపు  ముసుగు వేసుకుని గమనిస్తూ వుంది .అప్పుడు వాళ్ళన్నారు ''పాపాయి పుస్తకాలు కానీ ,బట్టలు కానీ ఎవరికీ ఇవ్వకూడదు. తీసికెళ్ళి సముద్రంలో పారెయ్యండి .లేకుంటే పాప వృద్దికి నష్టము ''అని  .అంతే పాపాయి చటుక్కున లోపలికి  వెళ్లి పోయింది .వాళ్ళు తిని వెళ్ళాక పాపాయి నాకు గోడపై అది చెక్కిన శిలా శాశనం చూపించింది .అదీ మధ్య కిరస్తానీ అయింది.ఆ కథ ఇంకో సారి చెబుతాను .దాని శిలా ఫలకం ప్రకారం పేద వాళ్లకి దాని పుస్తకాలు ,బట్టలూ ఇవాలి ఇవ్వాలి .సముద్రంలో పడేయకూడదు.అట్లా అని దాన్ని ఎవరూ శాశించకూడదు .చివరికి తన పేరెంట్స్ కూడా 

2] పాపాయికి మొన్నవాళ్ళ ఫ్రెండ్ బర్త్ డే పార్టీ కి వెళ్లి వచ్చిన తరువాత నుండి హటాత్ గా జబ్బు చేసింది .నిండా జలుబూ దగ్గూ జ్వరమూ .అవతలేమో 17 న వాళ్ళ స్కూల్ వార్షికోత్సవం .డాక్టర్ కి చూపించుకుంది మందులేసుకుంటుంది .అయినా అనిత ఏం చేసిందీ  ...దిష్టి తగిలిందని చెప్పి దిష్టి తీసేందుకు మంత్రగాడిని తెచ్చింది .పాపాయి ముఖం చిట్లించింది.అయినా ''సరెలేవే వెళ్ళు అనిత ఫీలవుతుంది'' అంటే వెళ్లి నిలుచుంది .ఇవాళ మళ్ళీ వచ్చాడు మంత్ర  గాడు .మంత్రించి ...''ఎక్కడైనా ఏమైనా తినాల్సోస్తే ఒక ముక్క నాలుక కు తాకించి తూ తూ అని పడేసేయ్యి అపుడు దిష్టి తగలదూ ''అన్నాట్ట .ఈ తతంగాన్ని  నేను అటెండ్ చెయ్యలేదు లెండి .పాపాయి లోపటి కొచ్చి ''అమ్మా అట్లా నోట్లో పెట్టి బయట పెట్టడమేమిటి.ఎవరైనా చూస్తే ఏమనుకుంటారు .నేను మంచులో డాన్స్ ప్రాక్టీస్ చేశా కాబట్టి  అనారోగ్యమయింది .మందులు వేసుకుంటే పోతుంది .ఈ మంత్రాలూ అవంతా నమ్మకమ్మా .బీ  ఏ కమ్యూనిస్ట్ అమ్మా ...''అన్నది .

ఈ మాటలంతా ఒట్టు గా ,నిజంగా  నేను కానీ వాళ్ళ నాన  కానీ నేర్పించలేదు .నాకేమో చాలా డౌట్ వస్తుంది ఇది నా పొట్టలో వుండి రంగ నాయకమ్మ పుస్తకాలు గానీ బట్టీయం వేసిందా అని. 

[రంగనాయకమ్మ గారు కుటుంబ రావు గారిపై , విరసం పై పెట్టిన విమర్శ ఇక్కడ చదవొచ్చు]


http://www.andhrajyothy.com/vividhaNewsShow.asp?qry=2012/dec/24/vividha/24vividha1&more=2012/dec/24/vividha/vividhamain&date=12/24/2012