పాపాయి సేద్యం !!!

జల్దాపారా వైల్డ్ లైఫ్ సాన్క్చురీని డిస్కవర్   చేస్తూ మా అమ్మాయి చేసిన కామెంటరీ .డిస్కవరీ చానల్ లో లాగా అనమాట.

తొలి కన్ను తెరవగానే ఇవాళ మా అమ్మాయి''అమ్మా!చెట్లుకి నీళ్ళు పోసేసి వస్తానమ్మా అన్నది.అందుకని

సెలవు పూట అయినా ఆరు గంటలకి అలారం పెట్టుకుంది.ఆహా ...తెల్లారిందిక  అనుకున్నా నేను .

మా అమ్మాయి నేను బుర్ర కథ టీం అంటాడు పాపాయి వాళ్ళ నాన.అమ్మ 'తా...'అని ,'నా..'దగ్గరికి చేరుకోక ముందే పాపాయి ''తందానా...'' అంటుంది .

ఈ మధ్య యేమయిందీ ...పాపాయి అనేకంగా కార్టూన్ చానల్ చూడబట్టింది .నేనింక ''ఈ పద్దతేం  బాలేదు పాపాయి ''అని వక్కాణించా .పాపాయి స్పందించి ''అమ్మా నువ్వేం చూసేదానివీ'' అన్నది .నేను ''నేషనల్ జియగ్రాఫిక్ చూసేదాన్ని'' అన్నాను. .ఇక ఇప్పటి సంగతేంటంటే పాపాయి డిస్కవరీ  జ్వరంలో వుంది .మొన్న మద్యాహ్నం ఒక బేగ్ తగిలించుకుని ,షీలాని తోడుబెట్టుకుని మా ఇంటి పిచ్చి దుబ్బల్లో తిరిగి పక్షులు తెచ్చి పడేసిన కొన్ని చందనం విత్తనాలు డిస్కవర్  చేసి తీసుకొచ్చింది .అచ్చు డిస్కవరీలో చూపించినట్టనమాట .

మొన్న రాత్రి ఇద్దరం కుదురుకుని,బజ్జున్నాక''అమ్మా నాకు గార్డెనింగ్ చెయ్యాలని వుందమ్మా కానీ ఎట్లాగా హేమామేసేస్తది కదా''అన్నది.హేమ మా ఆవు.అప్పుడు నేను ...''చిన్నప్పుడు మేం చిత్తూర్లో ఉండంగా ఆ ఇంట్లో చేట్లేసుకోడానికే వీలుండేది కాదుబిడ్డా .అప్పుడేమయిందంటే మా అమ్మ ఒక రోజు ఒక నల్లటి దబరని ,చిల్లు పడిందీ అని పారేసింది నేనేం చేసాను, దాన్ని పట్టికెళ్ళి వీధిలో బోరింగ్ దగ్గర గుట్టగా వున్న దువ్వ మట్టిని జవిరీ... నింపీ ,ప్రైవేటు నుండి వస్తా వస్తా దారిలో ఒకళ్ళని అడిగి టేబుల్ రోస్ కొమ్మతెచ్చుకుని దాంట్లో వేసా,ఎన్ని పూలు పూసిన్దనుకున్నావ్''అని చెప్పి !
మనసుంటే మార్గముంటది అని,ముక్తాయించా ..

మా అమ్మాయి నా మాటలు పొల్లు పోనిస్తదా?రేప్పోద్దన్నే లేసి,ఖాళీ తోట్టులన్నీ మట్టి, ఎరువుతో నింపి నానని,నన్ను నర్సరీకి పటికేల్లి చెట్లు కొనిపిచ్చింది..అప్పుడేమయిందీ...నర్సరీలో ఆ మూల అమ్మకి బోన్సాయ్ లు కనిపిచ్చాయ్ .అమ్మ ఉత్సాహం తో ఊగి [అమ్మకీ కూతురికీ తేడా ఏం లేదు అంటాడు నాన] నాకవి కావాలి అంది .ఒకటి మర్రి చెట్టు,ఒకటి రాగి చెట్టు.నర్సరీ అతను అంతకంటే ఉత్సాహంగా ఊగి డబ్బు మాట అసలు ఎత్తకుండాతీసుకు పొండి..తీసుకుపోండి అని ఆవేశ పడ్డాడు.

 అప్పుడిక పాపాయి వాళ్ళ నాన..సెక్యురిటీ గార్డు ,పాపం వీళ్ళ మంచీ చెడ్డాచూడటం  నా బాధ్యత కదా..అని భావించి...

''మేడం అవి తీసుకోవద్దు ,తీసుకుంటే ఆ రెంటికీ పెళ్లి చెయ్యాలి ''అన్నాడు .అమ్మ  ,'లైట్ లే' వీళ్ళ మాటలు గానీ...అవంతా ఎవరు పట్టించుకుంటారు అని  ఆ రెంటినీ పటుకోచ్చేసింది..

ఇంటికొచ్చాక ఇంట్లో వుండే పది నోళ్ళవారూ ఆశ్చర్యపడి మర్రి కీ,రాగికీ పెళ్లి చెయ్యాల్సిందే అని బెంగాల్ జానపదాలని 

వినిపించారు. పాపాయి బహు ముచ్చట పడి ''అమ్మా ! రాళ్ళని పూజిస్తే తప్పమ్మా !చెట్టును పూజించొచ్చు .చెట్టు  ఆక్సిజన్ ఇస్తది కదమ్మా !!!''అని దాని బహు తెలివి వాదాన్ని ప్రదర్శించింది..

  .

..నేను కూడా మా అమ్మాయి తెలివికి ఇక చాలా ముచ్చటపడి,సరేలే ఇట్లాగన్నా  అందరం కలిసి వండుకుని,కలిసితినోచ్చుకదా అని ఆలోచించి'' నేను అబ్బాయికి అమ్మని... ''అని ప్రకటించా .ఎందుకంటె మర్రి చెట్టు లాటి పెద్ద... అన్నయ్య మా అమ్మాయికి వుంటం,బాగానే వుంటుంది కద!,అట్లాగే నిత్యం తళ..తళా...మెరిసిపోతూ,గల గలా 

కబురులు చెప్పే రావి చెట్టు లాటి కలుపుగోలు కోడలుంటే ఎవరికి బాగుండదూ... అందుకని!!

అమ్మాయికి అమ్మ ఎవరో ఇంకా తెలీదు .మర్రి చెట్టు అబ్బాయి పేరు' కృష్ణా 'అని ప్రకటించా నేను .నాన కుదరదు  ఎప్పుడూ హిందూ పేర్లేనా ''బుద్ధ ''అన్నాడు.నేనూ ,పాపాయీ  సరేలే మేమేం చేసినా నాన మమ్మల్నితిట్టడం లేదు కదా  అని, నానని క్షమించేసి ఆ పేరుకే ఒప్పుకున్నాం .పాపాయి లేటెస్టుగా 'ఆంగ్లో ఇండియన్'అయింది వాళ్ళ స్కూల్  ప్రినిపాల్ లాగా.అందుకని క్రిస్టియన్ మేరేజ్ చెయ్యాలి కంపల్సరీగా అని ప్రకటన చేసింది.  ,ఇంకానేమో ,రావి చెట్టు  వాళ్ళ నాన మా   'ఎడ్వర్డ్ సారే' అని డిమాండ్ పెట్టింది.

కోడలి  పేరు'ఆమోదిత'.అంటే హపీనెస్ అంట .మనిషికి,యేవున్నా...లేకున్నా కడుపునిండా సంతోషం వుంటే చాలుకదా అందుకని ఆ పేరు పెట్టా .కోడలు రావటం అంటే సంతోషం రావటం లాగన మాట .కానీ మా అమ్మాయి కస్తూరి అన్నది.

అంతా అయ్యాక నా ఫ్రెండుకి ఫోన్ చేసి నా కొడుకు పెళ్ళి, వచ్చేయ్యవా  మీ ఆయన్ని తీసుకుని అంటే ''...సరిపోయినారు అమ్మా కూతురు'' అని కాసేపు విసుక్కొని , ఏ ఫ్లైటు కి  రావాల ,మా మావయ్య[వాళ్ళాయన]ఎందుకులే ...నేనొస్తా అన్నది .అదన మాట విషయం .

పాపాయి సేద్యం ఆ గతులలో నడుస్తుంది ఇప్పుడు.

పాపాయి జీవితంలో ఒంద  రంగులు వుండాలి  అని అమ్మ కోరిక .పెద్దయ్యాక అందులో ...చెట్లనీ ,పిచుకల్నీ విచిత్ర కథల్నీ,జంతువుల్నీ, మంచి బుద్ది  మనుషుల నీ  ,నదుల నీ  ,కొండలనీ , చిత్రించిన కుంచె మా అమ్మ అని అది మురుసుకోవాలి .